- 277 -

1372. Dez. 2. Liegnitz.

Die Herzoge Ruprecht, Wenzel, Boleslaw und Heinrich geloben dem Herzog Ludwig und dessen Sohn Heinrich sowie ihren Städten Goldberg und Liegnitz, ihr Land 10 Jahre ungetheilt zu regieren. Wer dagegen handelt, soll Einlager zu Kreuzburg halten, bis Herzog Ludwig die frühere Einheit wieder hergestellt hat.

In gotis namen amen. Wir Ruprecht, Wenczlaw, Bonczlaw vnde Heynrich, gebrüdirre, von gots gnaden herczogen in Slezien herren zcu Legnicz vnde zcum Goltberge bekennen offentlichen in desem briffe allen den, dy dysen briff sehen adir horen lezen, daz wir myt gemeyner willekor, myt wolbedochtin rate vnde guten willen, myt rate dez irluchtin fursten herczog Ludwigs, herren zcum Brege, vnsers lyebin vettirn vnde ouch myt rate vnsir getruwen manne, beyde, rittir vnde knechte vnde vnsir stete, burgern zcu Legnicz vnde zcum Goltberg, dez zcu rate vnde in eyn worden synt, daz wir alle vyre vngeteilt vnde vngeteylunge adir sunderunge zcu heischen bynnen der zeit noch man noch burger dorumbe mogen angereden vnde gelobin in guten trewen ane alle argelist den irluchtin fursten herczog Lodwige dem vorgnantin, vnde herczog Heinrich, synem sone, ouch herczogin in Slezien, herren zcum Brege, vnsirn lyebin vettirn vnd vnsirn getruwen rittirn vnde knechtin, benamen, hern Petirn von Parchewicz, hern Hansen von Kottewicz, hern Tyczczen Wehestin von Czedelicz, hern Otten Buzewoy, Pasken vom Swencz, Hansen von Slewicz, Stephan Trachen, Nyckeln Pyzkersdorff, Otten von Slewicz, Henczscheln von Redirn, Heyneken von Schellendorff.. her Albrecht von Czedlitz, her Tyczcze von Czedlicz von Alcznow, her Jenchen von Redirn, Friczcze Coppachcz,. Hertel Buzewoy vnde allen vnsirn lantlewten, gemeynlichen vnsir lande Legnicz vnde Goltberge vnde vnsirn borgern vnde ratlewten der selbin vnsir stete Legnicz vnde Goltberg, dy iczunt synt, adir hernach zcukomftigen werden vnde alle der gemeyn der selben stete, dy vorgenantin voreynuge gancz vnde stete zcu halden dy vorgenanten zcehen jore vnde bey enandir zcu blyben ane argelist bei vnsen trewen vnzcubrochlichen, alze vorgescrebin sted, vnde keyne teylunge zcwischin vns bynnen der vorgenanten zcit zcu habin, noch zcu tun, noch zcu heyschin, sy geschee denne myt der vorgenanten vnsirn vettirn, vnsir manne vnde burgir rate, wissen vnde willen, myt enandir eyntrechtlichen vnde welchir vndir vns dy vorgenante vnsir voreynunge weygirn wurde bynnen der vorgenanten zcit, zo globe wir vnsir iczlichir besundirn in guten truwen ane argelist, welchen vnsen vorgenantin vettern manen vmbe dy weigerunge vnde vmbe den broch, ap wir brechen, daz wir sullen vnde wellen ane wedirrede kegen Cruczberg inryten vnde eyn recht ynlegir do halden, byz daz wir den broch wedir teten nach vnsir vorgenanten vettirn wylle vnde vnsir manne vnde borgern der vorgenantin rate, dorumbe gebyte wir vnde heisin vnde habin geheisin vnde gebotin allen vnsen getruwen, den vorgenanten rittirn vnde knecht vnde burgirn vnser vorgenanten stete vnde allen gemeynen bey vnsirn hulden vnde bey den trewen, dy sy vns scholdik synt, daz sy bynnen den vorgenanten zcehen joren, alzo wir vnser eynunge gekoren, gewilkort vnde gelyebit habin, bey keyner teylunge sundirunge adir scheidunge syn sullen, dy bynnen der czit czwiscin vns gesehen mochte adir worde vnde ouch vnsir keym besundirn noch ouch andim lewtin, ap wir sy bynne der zeit an ymande wysetin, nicht sullen hulden noch globin alzo lyb sy vnsir vngnade vormyden wellen, alzo sy ez ouch von vnsirm geheyzse vnde gebote in vnsir kegenwertikheit den egnanten vnsen vettirn in guten trewen globt habin, iz geschee denne myt der vorgenanten vnsirn vettirn vnde ouch lyebin getruwen wissen, willen vnde rate myt enandir eyntrechtlichen, vnschedelichen der irluchtin furstynnen vrowen Hedwigin herezogin zcu Legnicz vnsir elichen hawzvruwen vnde swestirn an erim leybgedynge zcum Goltberge, daz ir volgen sal in allir wyze, alzo iz vnsir egnantir vettir herczog Ludwig gethedingit vnde gemachit hat. Wenne wir globin in guten truwen ane argeliste, alzo vor an der vorgnante teylunge vnde sachen ane vnsir egnante vettirn vnde vnsir getruwen manne willen nicht zcu tun. Ouch zal der eldeste brudir vndir vns, welchir der ist, adir syn wirt, alle dy leen, sy synt geistlich adir werltlichen, dy wir zcu lyen habin vnde von vns zcu leen geyn, bynnen den vorgnanten zcehen joren volkomlichen haben zcu lyen vnde alle sachen in vnsirn landen zcu horen, zcu richten, vff vnde abe zcuseczczin, zcu beschuczczen vnd beschermen nach vnsir manne vnde borger rate, alzo gewonlich ist eym herren in syme lande ane der andirn wedirspreche vnde ap vnsir keyner do wedir rette vnde em duchte, daz em dor an icht zcu korz geschee, zo sulle wir komen myt enandir vor vnsen vorgnanten vettir alzo vor vnsir eldeste frunt vnd vor vnsir man vnde borger vnde nyrne andirs vnd sullen dorumbe tun vnde iz alzo halden, wy vnde waz sy vns heyzsin ane alle wedirrede vnde globin daz allis in guten truwen ane arge vnbrechlich zcu halden in allen wyze alzo vorgescrebin stet, vnde habin dez zcu bestetunge vnde zcu merer sichirheit, wir drey vorgnante brudir, vnsir iczlichir besundirn vnsir ingesigel vnde dor zcu vnsir aller vyren lantingesigel an desin briff mit vnsirn rechtin wissen heisin hengen zcu Legnicz am dornstage nach sente Andrews tage, nach gots geburte dryczenhundirt jor in dem zewen vnde sebenczichstin jore, do bey synt gewest vnsir vorgnanten lyebin getrewen, her Petir von Parchewicz, her Hans von Kottewicz, her Ticzen Wehestin von Zcedelicz, rittire, Hans von Slewicz, Stephan Trache, Friczcze Coppachcz, Hertel Buzewy vnde andir vnsir getruwen manne vil. . vnde vnsir getruwen borger, Nyckel Heigener, borgermeystir zcu Legnicz, Nyczcze Teschener, Hans Polkwicz, Hans Korp, Petir Kuhelborn, Nyczcze von der Heide, Peczcze Keiner, borgermeystir zcum Goltberge, Otte Ruzsewyn, Hanke Hozebendel, ratlewte zcum Goltberge vnde Thomas, vnsir scribere, dem desir briff beuolen wart.

O. d. St. L. No. 128. An roth und violetten Seidenschnüren drei Siegel, das Herzog Ruprechts ist abgefallen.

Urkunden-Buch der Stadt Liegnitz und ihres Weichbildes bis zum Jahre 1455 - Herausgegeben dr Friedrich Wilhelm Schirrmacher - Liegnitz 1866